هو اللي ...
· ممكن يعدى الثلاثين ولسه عايش مع أبوه وأمه وماعندهوش مشكلة
· بيفهم فى الطب ويشخص المرض ويوصفلك الدوا وبيفهم فى النقاشة والكهربا وتصليح العربيات والطبيخ والسياسة والكورة وهو أبيض ياورد
· بيحط الريموت كونترول فى كيس بلاستيك كعادة فرعونية
· يقف يتكلم على الباب نص ساعة بعد انتهاء الزيارة والسلام
· لما تفتح نملية المطبخ حتلاقى عنده عشرين برطمان بتاع مربى فاضى بقالهم سنين ومازال مُصِر على جمع المزيد
· ييجى بعد معاده بساعتين ويفتكر إن ده عادى
· لسه عنده إصرار انه يتكلم بصوت عالى فى التليفون لما تكون المكالمة دولية عشان التانى يسمعه
· بيعتبر نفسه أفضل واحد فى الشراء والفصال وبعد كده يكتشف إن الحاجه فى المحل اللى جنبه أرخص من غير فصال
· بيحتفظ بأكياس محلات اللبس والأحذيه وورق الهدايا تحت مرتبة السرير لسنوات ومايستخدمهاش
· عنده صينية مكسرات متقسمة لتلات أو أربع أقسام لزوم المزاج وعمره مااستخدمها
· بيشترى قبل الفطار فى رمضان مواد استهلاكية أصلاً موجوده عنده فى البيت لسه مااستخدمهاش
· بيكون عنده شواية لزوم الرحلات أقصى استخدام لها كان مرة واحدة فى العيد
· بيشيل طابع البريد من على الظرف لو الختم ماكانش عليه
· بيفتكر إن أى حد بيشتغل فى الخليج بيغرف فلوس من غير حساب
· لسه بيخلط بين أغنيه بوس الواوا وأغنية الواوا أح وبيفتكرهم أغنية واحدة
· بيكون مشغول بقيمة التبس (البقشيش) طول العشا ياترى ربع جنيه وإلا نص جنيه
· بيتخانق ساعة دفع الحساب بحرارة شديدة على إنه هو اللى لازم يدفع
· سرقوا منه العربية بس مشكلته هى (المايتى زينجر)
· بيفرش ملاية سرير على طقم الأنتريه عشان يفضل نضيف لما ييجى ضيوف ومابيشيلهاش لما ييجوا
· والأهم إنه اللى بيحب يسخر من نفسه ومن بلده وحكامه ، بس مايطيقش حد تانى يسخر منهم .. ساعتها بيفرش له الملايه
الرئيسية 
الثلاثاء ديسمبر 23, 2014 10:11 pm من طرف 
