تشترى المصرى

موضوع: تشترى المصرى السبت يونيو 14, 2008 8:52 am

أي المشهدين التاليين حدث معك؟!

***

[ندعوك للتسجيل في المنتدى أو التعريف بنفسك لمعاينة هذه الصورة]

في المول الفخم الفخيم، يعجبك قميص ما، تقترب من البائع لتسأل على المقاس، ثم تدخل البروفة وتنظر لنفسك في المرآة بعد أن ارتديته فيعجبك جدا، وتقرر شراءه، وأنت تخرج فلوسك تلمح "التيكيت" المكتوب عليه البلد الذي تم فيها إنتاج القميص، وقبل أن يضعه البائع في الحقيبة المخصصة له تمسك يده في عنف قبل أن تصرخ:
- إيه ده.. هو القميص مصري؟
- أيوه حضرتك.. ده من أجود أنواع القطن المصري
- لأ لأ.. نو نو.. تؤ تؤ.. إزاي ألبس قميص مصري أنا؟!
- عادي حضرتك زي ما قلت لك ده ما يقلش جودة خالص عن المنتجات العالمية.. عادي يعني هتلبسه زي أي قميص ويمكن أحسن.. مفيهوش بودرة عفريت يعني هتخليك تهرش ليوم القيامة!
- لأ.. مستحيل.. ما أقدرش.. هي غسلة واحدة بس وتلاقيه كش ولونه اتغير وماعدش ينفع "حاتم" ابن أخويا الصغير يلبسه.. سوري.. مش هاقدر أشتريه..
- لا حول ولا قوة إلا بالله.. طب حضرتك خده هدية لحاتم طيب!
- وليه حاتم يلبس مصري لما ممكن ألبسه مستورد.. فوتك بعافية!
- الله يعافيك.. خليك في المستورد.. يارب حرب عالمية تقوم ومايبقاش فيه لا استيراد ولا تصدير عشان تلبسوا المصري.. وأنا بإيدي اللي هزود بودرة العفريت!

[ندعوك للتسجيل في المنتدى أو التعريف بنفسك لمعاينة هذه الصورة]

***
في محل ملابس جاهزة متوسط، يعجبك قميص ما، تقترب من البائع لتسأل على المقاس، ثم تدخل البروفة وتنظر لنفسك في المرآة بعد أن ارتديته فيعجبك جدا، وتقرر شراءه، وأنت تخرج فلوسك تلمح "التيكيت" المكتوب عليه البلد الذي تم فيها إنتاج القميص، فتتأكد من المعلومة وأنت تقول للبائع:
- مصري.. هاه؟
- صنع غزل المحلة كمان.. كفاءة يعني!
- هتقولي على المحلة.. تعرف أنا بحب قوي أشتري المنتج المصري
- لا حول ولا قوة إلا بالله.. طب وليه بتعمل في نفسك كده؟!
- حاجات كتير والله.. فيه منتجات أنا شايفها كويسة فعلا ولا تقل جودة عن المنتجات العالمية.. وكمان بتكون أرخص وأهو الواحد يدعم صناعة بلده
- ربنا يبارك فيك يا أستاذ.. يا ريت كل الناس زيك- ثم يميل البائع على أذن أحد زملائه وهو يهمس له: "سمعت.. ابقى اتأكد بقى إن التيكيت المضروب اللي حاطينه على الهدوم الصيني مكتوب عليه صنع في غزل المحلة!".. أي خدمة يا فندم.. نورتنا.. تحيا مصر!

[ندعوك للتسجيل في المنتدى أو التعريف بنفسك لمعاينة هذه الصورة]

***

قلت لنا أنت مين في دول بقى؟

بتهرب فعلا من المنتج المصري وكأنه "سلعوة" مفترية هتعضك من رقبتك؟!
ولا بتاخده في حضنك وكأنه صاحبك اللي مشفتهوش من زمان؟!

شايف إن دي أصلا نقطة مستحقة النقاش ولا خلاص ده كان زمان و"جبر".. ومنتج مصري مين يا عم الحاج اللي جاي تتكلم عنه؟

طب والله فكر في الموضوع هتلاقيه فيه أكتر من نقطة تستحق النقاش

أولا..

خلينا نتفق إن قوة أي دولة في جودة المنتجات اللي بتخرج من مصانعها بل إن فيه دولة بتتعرف من منتجاتها من غير أي مجهود.. زي مثلا أجهزة الكمبيوتر أو التليفونات اللي بتيجي من اليابان وزي المعدات الثقيلة اللي بتيجي من ألمانيا.. كده يعني فهل أنت شايف إن مصر عندها منتج واحد على الأقل يعتبر زي "علامة تجارية" خاصة بيها كده؟

ثانيا..

هو الواحد فعلا ممكن يشتري منتج مصري عشان يشجع صناعة بلده؟ ولا ده كلام نظري ممكن يحصل في الستينيات مش دلوقت خلاص.. خصوصا إنه من حق الواحد يشتري منتج كويس.. ليه يدفع فلوس في منتج نص نص؟

ثالثا..

بصفتك راجل خبير "احنا واثقين من ده!" شايف الأزمة فين.. في المنتجات المصرية اللي مش كويسة وتؤدي إن المصريين يهربوا منها.. ولا في المصريين اللي عندهم عقدة خواجة ويحبوا يشتروا أي حاجة مستوردة كده وخلاص؟

رابعا..

بصفتك راجل خبرة -دي غير خبير!- شايف إن فكرة شراء أو عدم شراء البضائع المصرية دي مرتبطة بطبقة معينة "الأغنياء والفقراء" ولا دي حاجة مالهاش علاقة بالفلوس؟

خامسا..

مافيش خامسا!

سادسا..

ما تكتب لنا رأيك وكلمنا بقى وقل لنا..

[ندعوك للتسجيل في المنتدى أو التعريف بنفسك لمعاينة هذه الصورة]

تشتري المنتج المصري ولو كان سلعوة
ولا بتجري منه لو كان قطة مغمضة؟

موضوع جميل فعلا ويستحق النقاش
بالنسبة ليا انا لو شفت حاجه وعجبتني وقستها وخلاص هشتريها وبعدين اكتشفت انها صناعه مصريه
مش هسيبها لمجرد انها صنع في مصر

بس برده في حقيقة محدش يقدر ينكرها ان المستورد احسن من المصري بس ده مش عيب في الخامات او قلة خبره
في نظري ان العيب في الناس لانها بتشتغل من غير ضمير ومش بتتقن عملها
وبالتالي النتيجه ان المنتجات المصريه بتطلع مش حلوه واي كلام

لو كل واحد راعي ضميره في شغله واتقنه على اكمل وجه
مش هيبقى في احسن من المنتجات المصريه

والف الف شكر احمد على الموضوع الجميل

صح يا اسماء
انا معاكى ان المساله بقت مساله ضمير دلوقت
اية اللى خلى المنتجات الصينية تغزو العالم
لانهم بيشتغلوا بضمير واسعارهم رخيصة

الموضوع جميل بس انا عامه مش بسيب اى حاجه عشان هى مصرى بس قليل اصلا لما تلاقى حاجه مصرى وجيدة يعنى
انا شايفه ان لو فى منتج مصرى وجيد اى حد هيشتريه

صح يا لينة
بس احنا عيبنا هنا الضمير بكل صراحة
ميت
فاحنا لو صحينا ضميرنا
اكيد حنعمل حاجة مشرفة

شكرا على مرورك
واهلا بيكى معانا

» مادونا تشترى حريتها بحوالى 76-92 مليون دولار..يابلاش
» يا ترى المصرى لسة هو المصرى
» اضحكوا على طرائف الشارع المصرى