كرسى الاعتراف (sasoo )

الاول انا بشكرك عالاجابات اللى انتى مش مريحانى فيها خالص
ههههههههههههههههههههههههه
بس ولا يهمك
فى اجابات بتبقى حريه شخصيه

اما بالنسبه باه لحكايه القدوه دى
انا مقصدتش بيها انى اكون كوبى من حد تانى بس اكيد فيه حد فى حياه كل واحد بيعمل حاجات صح حلوه
وهو نفسه يبقى زييه فيها ومش كده بس ده هو بيحاول يخلى نفسه احسن واحسن
مش انى اخد شخصيه حد تانى
بس ده اللى عاوز اوضحه

اما بالنسبه للاكل انتى تامرى والله يا ساسو


وبعدين انتى فى اداب انجليزى مش زراعه يعنى ارحم بكتير
ياريتنى كنت مكانك او فى كليتك عالاقل
لانى بعشق حاجه اسمها انجليزى

اولا ميرسى على الرد والمتابعة
بس لغاية دووقتى مش عارفة الاجابات مش مريحة ازاى يعنى ؟؟؟
ثانيا انا فهمت قصدك فى موضوع القدوة بس كل اللى اقصده انى مش عايزة شخص واحد بس انا عايزة اخد كل حاجة حلوة من كل شخص انا بحبه .. بس مش اكتر يعنى
اما بالنسبة للأكل انا من ساعتها وانا مجليش اى اكل .. انا عايزة الوجبة بتاعتى بقا
اما بالنسبة للكلية زى ما بيقولوا كدة انيل من .. لــ ...
وميرسى على متابعة حضرتك مرة تانية

نجى بقا لسمسمة اللى مش عايزة تسبنى فى حالى
اية سا سمسمة الاسئلة دية كلها هو انتى بتقولى دعونى انتقم ولا ايية ههههههه

عامة ندخل على الاسئلة
اذكري لنا موقف طريف حدث لكِ ؟
والله يا سمسمة هو الموقف اللى ههحكيه مكن يكون طريف ليا ان
يصى يا ستى .. احنا شلة بنات بس فى بعض المهم انا بحب ارخم اوى فى الشلة من يويمن كدة واحدة صحبتى خطيبها بيكلمها قامت طبعا من وسط الشلة ومشيت بعيد علشان ترد ( عارفين طبعا الحركات النص كم دية قمت انا بقا وقولتلهم اتفرجوا علشان انا هروح اخضها وقمت ماشية براحة جدا وراها وهى مش حاسة وكلهم بيتفرجوا وساكتين وفجاة .... اتكعبلت فى طوبة ووقعت طبعا منظرى انا اللى كان يضحك وبدل ما يضحكوا عليها ضحكوا عليا وطبعا البت بتبص وراها ووقعت على روحها من كتر الضحك وطول اليوم قعدت تقول من حفر حفرة لأخيه وفضلوا طول اليوم يتريقوا عليا انا ههههههه ودة يا ستى كان موقف طريف خفيف


ماهي نقطة ضعفك ؟
بصراحة يا ستى انا معرفش نقطة ضعفى بس كل اللى اقدر اقولهولك انى باجى بالزن يعنى اللى يقعد يزن ويتحايل عليا كتير بعملهله اللى هو عايزه

متى أخر مره بكيتي حزناً ومتى فرحاً ؟
بصى انا بعيط كتير ومش هنكر كدة بس مش سهلة ان حد يشوف دموعى .. اقرب حاجة زعلت فيها جدا لما واحدة صحبتى اوى وبحبها معايا فى الكلية وتعتبر انتيمتى .. وواحدة عايزة تفرق بينها وقالتلها كلام وحش فى حقى وهى زعلت منى اوى .. ساعتها حسيت بالظلم وان الصداقة اللى كتير بتكلموا عنها بتروح مننا احنا احلى اصدقاء .. ساعتها فعلا عيط جامد اوى
لما رجعنا لبعض بقا انا وانتيمتى وكل واحد فينا عاتب التانى وبقينا صافى يا لبن فعلا واحنا بنسلم على بعض ونحضن بعض عيط من الفرح
ههههههههه وكفاية بقا هعيط فى السؤال دة

حين تكوني بمفردك.... ماذا تفعلين؟

تصدقى يا سممسة انا بحب اقعد لو حدى اوى بس مش انطوائية يعنى .. اقصد يعنى انى مش بخاف وانا اقعد لو حدى وممكن اعمل كذا حاجة
يعنى مثلا ممكن ادخل المطبخ واخترع اى حاجة واقعد اجرب ( مع العلم انى فاشلة جدا فى المطبخ )
ممكن اعمل اى حاجة .. اقعد اتفرج على التلفزيون او اكلم اصحابى او اخترع جو رومانسى ميوزك هادية مع اقفل الانوار واسرح فى الحياة بقا .. واكتر حاجة ببقا بعملها لما اكون لوحدى بقعد احاسب نفسى فى كل حاجاة حصلت ... متقلقيش
بعمل كذا حاجة ومش بزهق بسرعة

اما سؤال الالقاب ... معلش يا سمسمة انا بعتذر عن اجابة السؤال دة .. وبصراحة علشان انا لسة معرفش اى حد فى المنتدى علشان اديله لقب .. بس ان شاء الله اول لما اعرف الناس العثل دية هرزعهم القاب على طول

انا قلت قبل كدة بس مش مشكلة اقول تانى انى بعشق المكرونة والكشرى والبيتزا والبطاطس والبانية وكفاية علشان انا كدة جوعت الاكلات...
المشروبات.. فى الساقع ميراندا تفاح وبحب العصاير الفريش وبحب اشرب فى الشتا كابتشينو
المطاعم... بصى يا سمسمة انا باكل فى كله لما يكون جيبى مليان يعنى فى بيتزا هت وكنتاكى وماك ومؤمن والكشرى كمان مش بتفرق معايا اوى يعنى هو الواحد لما يكون اول الشهر بس يعنى ههههه
وسائل المواصلات.. بحب اركب رجلى يا سمسمة بصراحة هههههه بس على حسب برضه مشاوير معظمها تاكسى بقا معلش اصلى بكره الزحمة بس مفيش مشاكل اركب حاجات تانية يعنى

انواع السيارات... بعشق الــ bmw

المصايف... هو انا مرحتهاش بس نفسي اروحها وهى شرم الشيخ .. قولى يارب بقا
الفصول... والله يا سمسمة انا بحب الصيف علشان جو الغروب وان الناس ماشية بليل كدة وجو المصايف ولاحاجات الحلوة دية وفى نفس الوقت بحب الشتا والدفا وكوباية الحاجاة السخنة فى ايدك وبعشق امشى تحت المطر واتفرج عليه من ورا الشباك وفى نفس الوقت بحب الربيع والخريف الجو بيبقا تماما اوى فيهم يعنى من الاخر بحب كله والحمد لله
الالوان.. بحب الصفاء فى اللون الازرق وبعشق الاحمر وبحس بالتفاؤل فى الاخضر والنقاء فى الابيض
الملابس...اكيد فى المعظم بحب الجينز حاجة سهله يعنى واتعود عليها
الشنط...الشنط دية على حسب الطقم بقا يعنى كاجول وكلية يبقا كبيرة علشان ارزع الككشكول فى الشنطة على الاقل ولو خروجة عادية يبقا شنطة روشة

الهوايات...تصدقى لغاية دوقتى معرفش اية هواياتى بس بحب اقعد على النت مش الشات يعنى والحركات دية بس بحب اقرا فى كل الاحوال
الطفوله..طفولة شقية شوية بس مش مع كل الناس
المشاهير.. بحب احمد حلمى واكيد احمد السقا وطبعا الفنان احمد ذكى الله يرحمه الراجل دة فى كل تمثيله كنت بصدقه اوى وبحب الشقية ياسمين عبد العزيز وناس كتير
الاغاني... الاغانى دية بتبقا على حسب المود .. يعنى ممكن اسمع هادى بليل وممكن اسمع دوشة ورقص واديها يا معلم

الافلام... بحب الرومانسى جدا وبحب الافلام اللى اطلع مها بحاجة فى الاخر وقصة جميلة كدة وبحب الدراما
المسلسلات.. بصى انا بحب المسلسلات اللى فيها اكتر من قصة وبحب مسلسلات زمان اكتر من بتوع دووقتى
المسرحيات.. ياه انا المسرحيات دية لو شوفتها خمسين مرة كل مرة بتفرج عليها اكنى اول مرة اتفرج عليها وبقعد اضحك اوى وطبعا بحب العيال كبرت اوى ومسرحيات كتيرة
الحكم... اضحك للحياة تتضحك لك
الامثال..ياقاعدين يكيكوا شر الجايين هههه دة اللى جه على بالى دووقتى
الاحاديث...

عن أنس بن مالك رضي الله عنه

قال: كان رسول الله صلى الله عليه وسلم يقول: "اللهم إني أعوذ بك من العجز والكسل والجبن والبخل وأعوذ بك من عذاب القبر وفتنة المحيا الممات".

سور القران.. طبعا بحب سور القرأن كلها وبحب اقرا سورة الرحمن اوى والواقعة ا
الشيوخ... بحب اسمع لمحمد حسان وبحب اسمع اوى عمرعبد الكافى
الفدائيين... مليش فيهم
الرؤساء.. بلاش احسن
البلاد.. نفسى اسافر والف حول العالم كله وخصوصا ابدأ بتركيا
الشعوب...مفيش احلى من الشعب المصرى وبحب لهجة اللبنانين
اهل مدينتك...ناس طيبة اوى وغلبانة اوى
المنتدى... نفسى اعرفه اكتر
اصحابك.. شلة العمر واجميل تهييس

انواع القلوب.. مفيش احلى من القلب الطيب
نفسك... الحمد لله راضية جدا جدا عن نفسى

ياااااااااااااااااااااااه اخيرا خلصت الامتحان اية يا سمسمة الطحن دة
عامة يا جماعة انا بعتذر طبعا عن تأخيرى بس النيلة اللى اسمها الكلية بقا
وبرضه مستنية اسئلتكوا بس براحة عليا شوية وهاتولى حاجة اشربها بقا
ويارب اجابتى المرة دية تكون مريحة شوية

وتحياتى للجميع

sasoo انتظريني
بحضر الاسئله اهو وجايه

يالا يا ساسا
نبدأ
بسم الله

ماهو المكان المحبب لـيكي والتي تزورهـ كثيراً..؟؟

ماهي المقولة إلتي ترددهيا في جميع الأوقات وتراها مناسبة لحالتها ..؟؟

شيء تحتفظين بة ويذكرك بشخص عزيز وغالي عليك..؟؟أذكرية .
لا يوجــد شخص الا وله امنيــه يحلم بتحقيقهـــا فما هي امنيتكـ في الحياه ؟
ذكـــرى جميـــله لــن تنسيـــها واخـــرى لهــــا اثرهـــا في نفســــكـ
اية اللون اللي تحبيـــه .. ويجذبكـ .. ؟

أفضـــل أكلـــه تحبينهــــا ..؟

ما الشيء الذي تعلمتيه من اشترااككـ في منتدى أفندينا..؟

دول شويه صغيرين لسه في تاني
ههههههههههههههههههههه
لي باك

ازيك يا ساسو عامله ايه
منوره وعهد الله
بصى باه الاسئله دى عباره عن سؤال متفرع
ويلا جاوبى وانا جاااااااااااى تااااانى

ليت الشباب يعود يوما ً...

كثيرون يتمنون لو يعودون بالزمن الى الوراء ، الى الطفولة ، الى ايام الصبا والشباب ، ليوقفوا عقارب الساعة هناك ، ويعيشوا احلامهم من جديد ...

طالما أن ليس على الأمنيات جمارك أو ضرائب ...

ماذا تغيَرى لو عاد بك العمر الى الوراء ....؟؟؟
وكيف تتعاملى مع عمرك الجديد .... ؟؟؟؟
ماذا تفعلى اذا عدت سنوات الشباب والمراهقة الى الوراء ... ؟؟؟
كيف ستبني حياتك.... ؟؟؟
من اي زاوية ستنظرى الى الحياة ... ؟؟؟
كيف سيكون تعاملك مع الناس بكافة معادنهم من جديد ... ؟؟؟
هل ستكفرى عن اخطائك اتجاه نفسك والآخرين ... ؟؟؟
كيف ستخططى لمستقبلك ... ؟؟؟؟
كيف ستجعلى من فشلك في تجاربك متعة لنجاحاتك عند العودة الى الوراء .. ؟؟

full mark A+
بجد اجابات جميله جدا
وعارفه احلى حاجه فيكى ايه
لالالالا
مش اغنيه حماقى
لا انا بقولك يعنى
احلى حاجه انك متفائله
وهو ده سر نجاح ناس كتير فعلا
انا كنت زيك تمام متفائل جدا
ولسه متفائل بس متعقد من الحياه اللى احنا عايشينها من الظلم وكده يعنى


واحلى حاجه ان الواحد يرتبط بالامثال الشعبيه
لانها مبنيه على اساس تجارب ناس تانيه
مش جايه من فراغ

اما بالنسبه لحكايه المستقبل
ربنا اكيد هو اللى بيخطط لكل حاجه وعارف احنا حنعمل ايه بكره
بس ده مش بيمنع ان الواحد يفكر ممكن يعمل ايه لما يتخرج مثلا واللى فيه النصيب حيكون
فممكن تقولى عليه حلم مثلا او كده
بس اوعى يكون حلم طويل زى التوقيع اللى سمسمه حطاه

وده البيبسى بتاعك
[ندعوك للتسجيل في المنتدى أو التعريف بنفسك لمعاينة هذه الصورة]


انتظرينى قريبا

ههههههههههههههههههههههههه
هييييييييييييييييييييية
هيييييييييييييييييية
وطلعت بالبيبسى بتاعى وانتوا لا
وكمان اخد full mark A
محدش قدى يا جدعان
وميرسى على متابعتك ورائيك الجميل
واحنا تحت الخدمة
ومنتظرة الجميع

على فكره
تقريبا لسه فيه اسئله الصفحه اللى فاتت
لما تخلصى البيبسى ابقى اقريها
وماتخلصيش البيبسى كله
عشان تكمليه بعد الاسئله

ههههههههههههههههههههه
سورى معلش
.ماهو المكان المحبب لـيكي والتي تزورهـ كثيراً..؟؟
بصى بالنسبة لمكان بزوره كتير .. ودة لما اكون مع اصحابى يبقا سيتى ستارز علشان فيه كل حجاجة اذا كنا عايزين نشترى لبس ولا ناكل ولا نقعد فى كافيه ولا نروح سينما فكل دة فى مكان واحد وحتى لو مش معانا فلوس وعايزين نتمشى برضه هناك .. اما لو سألتينى اية المكان اللى بتحبيه ونفسك تروحيه هقولك اى مكان على النيل .. بعشق المنظر من على النيل كدة برتاح نفسيا من جوة بصراحة

ماهي المقولة إلتي ترددهيا في جميع الأوقات وتراها مناسبة لحالتها ..؟؟
مش عارفة مفيش حاجة معينة كل حاجة وبتبقا على حسب الموقف بصراحة بس دايما اقول لا يا شيخة ولا يا راجل ههههههه مش عارفة لية

شيء تحتفظين بة ويذكرك بشخص عزيز وغالي عليك..؟؟أذكرية
هو فى المعظم ممكن تكون صور بتبقا احلى تذكار
سواء مع اصحابى او عائلتى .
لا يوجــد شخص الا وله امنيــه يحلم بتحقيقهـــا فما هي امنيتكـ في الحياه ؟
ياااااااااه نفسى فى حاجات كتير .. نفسى انجح فى الدراسة واحبها واشتغل فى مجالى يخص دراستى واكبر واحدة واحدة يعنى مثلا نفسى ابقا مترجمة صغيرة لغاية اما اكبر واحدة واحدة واترجم كتب لناس مشهورة وفى نفس الوقت اعيش مع انسان يكون بينى وبينه قصة حب فظيعة لكام سنة كدة ونتجوز عن حب ونعيش مع بعض عن حب وتبقا حياتنا مجنونة ورومانسية فى نفس الوقت وببسيطة جدا ومش معقدة وبرضه يكون هو صغير فى شغله وواحدة واحدة واحنا جنب بعض يشجعنى واشجعه ونكبر سوا ونسافر كل سنة بلد جديدة لغاية لما نلف العالم وبيتنا كله صور لحبنا ونجاحنا فى نفس الوقت ..... بس كفاية علشان انا طلعت بحلم حلم طويل وكبير اوى .. طلعت خيالية ... صح ؟؟؟

ذكـــرى جميـــله لــن تنسيـــها واخـــرى لهــــا اثرهـــا في نفســــك
هقولك فى كل مرحلة من سنين الدراسة بطلع رحلة مع اصحابى كل رحلة بتبقا احلى من اللى قبلها ومش بنساها ابداـ
اية اللون اللي تحبيـــه .. ويجذبكـ .. ؟
الاحمر بحس انه جذاب جدا والابيض او لون السماء الازرق الصافى دة بيهدينى جدا وبحس بالتفاؤل فى اللون الاخضر لون الزراعة كدة

أفضـــل أكلـــه تحبينهــــا ..؟
طبعا المكرونة والبطاطس وبعشق الكشرى من الاكلات الشعبية

ما الشيء الذي تعلمتيه من اشترااككـ في منتدى أفندينا..؟
بصراحة انا مش بقالى كتير هنا بس كل اللى اقدر اقوله انه فيه ناس بتحب بعضها كأخوات ودة شىء جميل وانه منتدى بيعمل حاجات كتير علشان يكبر وان شاء الله السنة اللى جاية فى نفس الميعاد هقولك شايفة المنتدى كبير ومليان بالأعضاء ازاى
وبجد بتمنى كل التقدم والخير للمنتدى وكل الناس اللى فيها

ومنتظرة المزيد .. اما اكمل البيبسى بقا

ازيك يا ساسو
انا جيت من تانى
بس معلش انا اتاخرت كنت مشغول بمشروع التخرج

نبدا باه

1-ايه احسن صفه انتى شايفاها فى نفسك؟ وايه اوحش صفه؟
2-ايه الصفه اللى بتحترمى الشخص اللى بيملكها
3-لو لاقيتى المصباح السحر او خاتم سليمان وطلعلك العفريت(اعوذ بالله من الشيطان الرجيم) لو يعنى حتتمنى منه ايه
4-ايه اطرف موقف مريتى بيه ؟ وايه الموقف اللى كان حيخليكى تبكى
5-امتى بتحسى ان اللحظه دى احسن لحظه فى حياتك(مثلا لما تكونى لوحدك..وكده يعنى) يارب تكونى فهمانى
6-ايه هى هواياتك المفضله
7-ايه احسن قسم فى المنتدى وايه اللى انتى شايفاه عشان المنتدى يتطور وايه القسم اللى انتى شايفه انه مش قد كده
8-ايه هو هدفك فى الحياه
9-سبب اختيارك لاسمsasoo
10-
ولا اقولك كفايه كده

اسئله سهله اهى

معلش يا جماعة على التأخير بس مشغولة شويتين
نبدأ فى السريع بقا بس حاجاة ساقعة علشان الدنيا الحر دية
1-ايه احسن صفه انتى شايفاها فى نفسك؟ وايه اوحش صفه؟

طبعا السؤال دة سألت حد من اصحابى علشان متغرش فى نفسى يعنى
المهم احسن صفة لقتها واكتشفتها فيا فعلا الحمد لله نعمة الصبر .. صبورة وزى ما بيقولوا كدة نفسى طويل فى الصبر
واوحش صفة واللى الناس شايفاها فيا البرود وانى باردة شويتين فى مواقف مينفعش فيها انى اكون باردة
بس بجد محدش فاهمنى فى الاتهام دة يعنى كل اللى بيقولوا كدة علشان ساعات فى وقت العصبية بكون هادية وانا بكون قصداها علشان اهدى الموقف بتقلب عند الناس ببرود بقا
بس انا عن نفسى شايفة ان ارخم حاة فيا انى رغاية اوى حاجاة رخمة اوى بس مش عارفة ابطلها

2-ايه الصفه اللى بتحترمى الشخص اللى بيملكها
بحب جدا الحنية وع فكرة مش اى حد عنده حنية حاجة حلوة اوى الحنية دية لما يكون اللى قدامك حنين هيبقا متفهم وبيحبك ويخاف عليك من اقل حاجة من حنيته
وطبعا بحب اى شخص متفهم وبيحب النقاش
وبحترم اى حد مثقف بحس ان لغاية عنده واقف انحنى سلاما له

3-لو لاقيتى المصباح السحر او خاتم سليمان وطلعلك العفريت(اعوذ بالله من الشيطان الرجيم) لو يعنى حتتمنى منه ايه
يااااااااااااه حاجات كتير .. انى انجح فى حياتى من كل حاجة وانها تتمشى زى منا عايزاهايعنى انجح واخلص من النيلة الكلية واشتغل فى مجال انا بحبه وانى اتجوز عن حب وتبقا قصة حب جميلة واكون اسرة مفيش اسعد منها واهم حاجة انى دايما اكون محبوبة عند كل الناس ياااااااااارب

-ايه اطرف موقف مريتى بيه ؟ وايه الموقف اللى كان حيخليكى تبكى؟
هو موقف بسيط بس اللى فكراه دلوقتى انى كان عندى سيكشن كمبيوتر ودخلت متأخرة وانا معنديش فرص غياب اصلا يعنى لو غبت مرة خلاص ضاعت عليا المادة المهم داخلة متأخرة قامت الدكتورة هى معيدة صغيرة يعنى وقفتنى وقالتلى مش هينفع تدخلى علشان انتى جاية متأخرة اعتذرتلها وهى برضه مرخخمة معايا وقالتلى الطلبة كلهم بيجوا من بعيد ويصحوا من بدرى انتى وراكى اية علشان تتأخرى قمت فجأة قلتلها انا اسفة يا دكتور بس انا متجوزة وعندى بنوتة وباجى من منطقة بعيدة جدا طبعا الدفعة وقعت على روحها من الضحك علشان كلهم عارفيم انى ولا متجوزة ولا نيلة ولقتها بصتلى من فوق لتحت كدة وقالتلى شكلك صغير قلتلها معلش بقا وحضرت المحاضرة على حس انى متجوزة بس طبعا طول المحاضرة تقولى المتجوزة المتجوزة ههههههه
والعيال كلهم بيذلونى علشان محدش يفضحنى .. بس الحقيقة تقال انا روحت قولتلها الحقيقة بعديها بأسبوع كدة وكانت عايزة تولع فيا بس عدت على خير ههه
ومن المواقف الرخمة بجد والمضحكة فى نفس الوقت ولسة حصلالى امبارح انى وانا ماشية فى امان الله واحدة بتقولى هاتى قلم قمت بلفت وشى واديهلها قمت وقعت فى حفرة وكانت مشكلة وكلهم واقعين على روحهم من الضحك من كتر المنظر وحصلتلى اصابة خفيفة فى رجلى بس اهو عدى انه موقف طريف وخلاص وااااااااااااه يارجلى
اما موقف ابكى عليه انى اخسر صديقة عزيزة عليا وانى اتظلم لان الظلم دة حاجاة بشعة بجد

امتى بتحسى ان اللحظه دى احسن لحظه فى حياتك(مثلا لما تكونى لوحدك..وكده يعنى) يارب تكونى فهمانى
بجد احلى لحظة بالنسبة ليا لما اكون لوحدى او مع شخص بحبه اوى اوى " يعنى مش اى حد " على البحر وقت الغروب بحب اللحظة دية ولما بكون لو حدى افضل ارمى كل همومى وتفكيرى فى البحر لغاية لما اصفى ذهنى بحس ان نفسى الوقت يوقف ساعتها علشان اللحظة دية تفضل طويلة
ايه هى هواياتك المفضله؟
كنت زمان بحب القراءة اوى بس بسبب انى الوقت بيعدى بسرعة مبقتش اقرا كتير ودلوقتى مقضيها خروجات ونت ومش راسية على حاجة

ايه احسن قسم فى المنتدى وايه اللى انتى شايفاه عشان المنتدى يتطور وايه القسم اللى انتى شايفه انه مش قد كده
هو طبعا المنتدى جميل والله بس ناقصة اعضاءاكتر علشان يزيد مشاركات ويزيد تشجيع ويكبر ويشتهر اكتر واكتر
وانا عامة بحب القسم العام ولسة لما اتعمق اكتر فى المنتدى هشوف اية احلى واية محتاجه

8-ايه هو هدفك فى الحياه
اكيد النجاح فى حياتى نفسى انجح اوى دراسيا وعمليا

-سبب اختيارك لاسمsasoo
مش عارفة بصراحة بس اصل اصحابى هما اللى طلعوه عليا من تلات سنين كدة وقلولى انه لايق عليا وبصراحة انا شايفة انه روش وجديد ومش رخم
يااااااااااااه اخيرا خلصت
مقولتليش مشروع التخرج بتاعك عن اية بقا ؟؟؟؟

معلش يا سمسمة هجاوبك بكرة بقا علشان الحق انام علشان محاضراتى بكرة
ادعوووووووووووووووووووووووولى
يارب استرها معانا يارب
وتحياتى للجميع

شكرا ليكى سمسمه
بالنسبه للبيبسى افتكرى ان انا مديكى 2 المره اللى فاتت
ماليش دعوه باه شربتيهم الاتنين ولا لا
ههههههههههههههههههههههههههههههههههههههههههههههههههه

مشروع التخرج بتاعى فى قسم الاقتصاد
اقتصاديات انتاج حيوانى تحت قسم انتاج اللحوم الحمراء
موضوع كده زى ماتقولى رخم شويه
بس حليتها مع الدكتور وخدت رساله الدكتوراه بتاعته

هالو ساسو
الاخت الجميلة الحبيبة الغالية العزيزة العفريتة الشقية المبدعة أستاذة علم الكلام الطيبة الحنونة
وحشتيني جدا ....
أنا ليا سؤال واحد بس هو ...


من هي ساسو الحقيقية ؟

شكرا ساسو أستاذتي العظيمة ومثلي الاعلي في الابداع

أخوك

ال
دي
زل

معلش يا جماعة انا بعتذر على التأخير
بس بجد علشان مشغولة شويتين فى الاختراع اللى اسمه كلية
نبتدى بقا نجاوب على اسئلة سمسمة

قولى ايه رايك بكلمه وااااااااااااااااااااااااااااحده فقط لكل من:


حاجة لا يمكن اسامح فيها الخيانه..

عملة نادرة فى الزمن دة الصداقه..

احلى احساس فى الدنيا ومن غيره مقدرش اعيش " بالنسبة ليا الحب زى النفس مقدرش اعيش من غير لما اتنفس او احب بمعنى اصح " الحب..

الحياه.. الحياة غريبة سبحان الله

الكدب.. ابشع الصفات

الراحه.. بتمناها طول الوقت " راحة البال "

الوداع.. كلمة صغيرة فى لحظة كبيرة



معاكى طلقه رصاص تضربيها على مييييييييييييييييين؟
ياااااااااه انا عايزة طلقات مش طلقة واحدة ..بصى يا ستى عايزة اضرب مين .. عايزة اضرب كل اللى بيخرب وبيدمر فى الدول العربية وبيقتل الاطفال البريئة وناس ملهاش ذنب.. عايزة اضرب رصاصة على ظالم فى الحياة علشان ميتحقش انه يعيشها اصلا ... نفسى اضرب رصاصة على كل خاين وكداب .. واخيرا نفسى اضرب رصاصة على دكتورة خانقنى فى الكلية بتاعتى

لديك 5 وردات لمن تهديها ؟
اول وردة اهديها لست الكل أمى
تانى وردة اهديها لأصحاب المدرسة اللى لسة ليهم علاقة بيا وبتمنى انها تفضل طول العمر
تالت وردة لأصحاب الكلية بجد ونفسى نفضل مش لغاية اخر سنة وننشغل عن بعض
رابع وردة هديها لأصحاب المنتدى دة اللى لسة بتعرف عليهم " يلا انشاله محد حوش "
خامس وردة هاخدها انا واديها لأنسان عزيز عليا

اكتر شخصيه مشهوره اثرت فيك ؟
بصى يا سمسمة ان مش فاكرة اسم شخصية دلوقتى .. بس عامة انا لما اقرا او اسمع عن حد كان عنده هدف وكافح كتير وفى الاخر وصل لهدفه ونجح بيأثر فيا جدا
واما افتكر اى اسم هاجى اقولك على طول هههه

كيفك ساسوو واحشاني كتير
خلاص كفاية كده مقدمات عشان ربي عالم بحبي وتقديري لكي
المهم عاوزة أعمل عصير وأعصرك جاااااااااامد
1- لو في المستقبل القريب بعون الله إرتبطي تحبي تسمي أولاك إيه؟
2- مناسبة كدبة إبريل كانت أمس هل ليكي زكريات مع المناسبة ديه؟؟؟ إيه الأخبار إلي سمعتيها مؤخراًوكانت حقيقة وإتمنيتي إنها تكون كدبة مش حقيقة؟؟
3- لازمة دايماً تقوليها ؟
4- آخر كتاب قرأتيه ؟؟ مسلي إنتي فاهماني مش كتب الكلية المملة ههههه؟
5- أختاري واحد من الإتنين:
جواز من واحد سبق إرتبطت ومخلف ولكن بيحبك أو واحد إنتي حبه الأول ولكن على الحديدة؟
بتميلي لوالدتك ولا والدك؟
تشتغلي ولا تكملي الماستر طبعا بعد التخرج؟
تسمعي لعمرو ولا لتامر؟
تساهمي في بناء مستشفى السرطان ولا تفسحي يتيم؟


وراجعة تاني

اهلا يا kitkat .. منورة ع فكرة
وميرسى على البيبسى
نبدا بقا
صفة تصفي بها نفسك ...؟
انسانة
شخصية لفتت انتباهك في المنتدى ....؟
والله لسة ملفتش فى المنتدى .. لما ابتدى اواظب فى الدخول هجاوب على السؤال دة
شخصيه تحترميها لا اراديا عند حضورها او رؤيتك لها في المنتدى ....؟
كلكم والله من اول الادمن والمشرفين والمشرفات ولاعضاء
ايه رايك في الصراحه بدون حدود ....؟
احلى شىء .. علشان بكره النفاق اللى هو عكس الصراحة بس اتمنى ان الصراحة دايما تتقال بطريقة حلوة مش اكتر من كدة
اكثر صفة تحبي انها تكون موجودة بالشخص ...؟
الحنية والكرم والتفاهم
كم ساعة تقعدي يوميا ع الكمبيوتر ....؟
فى الدراسة ممكن ص ساعة او ساعة على حسب بقا لكن الاجازة براحتى

أي أنــــوآع الفواكــه تحبي ....؟
المانجة .." فكهانى وبحب المانجة ههههههههههه "

اسئلة خفيفة ولذيذة ابقى تعالى تانى
ومنورة بجد

معلش يا ريري اتاتخرت عليكى بس انا كنت جاوبت على اسالتك من يومين وبعدين وانا بقدم الاجوبة النت فصل وملحقتش
عامة انتى منورة وهجاوبهم تانى بقا

- أحب الفصول لقلبك؟
والله يا ريري انا بحب فى كل فصل حاجة معينة يعنى بحب فى الصيف وقت الغروب وتقعدى كدة فى جو روش وخروجات ومصايف وصباح الدماغ .. وفى نفس الوقت بحب فى الشتا ساعة المطر ونزول التلج وفى ايدك كوباية نسكافيه سخنى تتدفيكى وجو رومانسى مية

2- ممثلة أو مطربة أو شخصية مشهورةتحسي إنها قريبة من شخصيتك؟
بصراحة يا ريري مفيش حد قريب من شخصيتى مش علشان شخصيتى نادرة ولا حاجة بس علشان ببساطة ان الوسط الفنى والممثلين والناس دية بيمثلوا يعنى معرفش شخصيتهم الحقيقة علشان اقول ان فيهم حد قريب من شخصيتى اصلا " وبعدين يا ريري انا مفيش منى اتنين اصلا انا ساسو واحدة فى الكرة الارضية

3- إيه رأيك بصراحة في كل من:

الحب بين طلبة بالكلية؟
الحب عن طريق النت؟
بصى يا ريري انا من وجهة نظرى ان الحب دة اسمى واجمل شىء فى الحياة واللى يقول عن الحب وحش يبقا هو اللى وحشه لكن مش الحب فى حد ذاته وحش يعنى العيب فى البنى ادمين مش فى الحب بس اهم حاجة الحب اللى بجد اللى بحق وحقيقى اللى يعيشك احساس عمرك ما هتحسه فى عمرك كله الا لو حبيت بجد من قلبك عارفة يا ريري الناس اللى بتحب اوى من قلبها ومبوطين مع بعضيهم دايما بيشوفوا الدنيا حلوة بعكس الناس العادية اما بالنسبة للحب الكلية او النت مش فارق الحل حل فى كل وقت وفى كل حتة ومينفعش اقول ان كل اللى بيحبوا فى الكلية او عن طريق نت فاشلين ومينفعش اقول ناجحين فى الاتنين كل الفرق ان الواحد يحب بجد وبأخلاص بالنسبة للكلية انا شايفة بس ان اللى يحبوا دول يحسوا بالمسؤلية ومينسوش انهم رايحين للتعليم فى المرتبة الاولى يعنى مش الحب .. يعنى مثلا لو واحد متفوق فى دراسته وعنده المقدره انه يشتغل مع الدراسة وفى نفس الوقت عنده المسؤلية وفى نفس الوقت محترم وابن حلال ومعجب ببنت الحل اية المشكلة بقا هنوقف الحياة علشان اسمه طالب... اما النت بقا يعنى هو نادرا لما ينجح بس دة معناه انه مش مستحيل انه مينجحش بس كل اللى ناقصه المصداقية واحساسنا بالمسؤلية شوية


الغلاء وهاتي حل سريع؟
الغلاء دة هيجنن الناس بجد بس كل اللى اقدر اقوله مفيش حل غير ان الحكومة تزود المرتبات زى ما زودت الاسعار وكدة تبقا مناسبة شوية وبرضه ان الناس تحاول توصل الموضوع دة للحكومة بأى طريقة بقا يمكن يحصل حاجة

4- حاجة بتخوفك فوبيا يعني؟
بصراحة معتقدش ان عندى فوبيا من حاجة معينة بس ممكن اقولك ان فى حاجة بتخنقنى اوى لما بسمع صوت الغراب بتخنق واتنرفز بس مش بطريقة زيادة يعنى

5- حاجة بتبسطك وتخليكي سعيدة؟
لما بقعد قدام النيل او البحر بليل فى جو رومانسى وموسيقى هادية كدة يااااااااااااه بجد عندى بتبقا احلى لحظات حياتى .. وطبعا لما تكون رحلة روشة فى وسط اصحابى

6- أغرب هدية إستقبلتيها؟
هههههههه بصى هى مش غريبة اوى كانت الهدية " شبشب " بس دة كان سببه انى كنت ماشية وكان عاجبنى شبشب روش اوى وشاورت عليه لأختى وبعدين مشينا ومحطتش فى بالى لقيت اختى جابهولى بعد كدة هههههه"

7- مدينة تتمني تسافريها؟
تركيا نفسى اسافرها اوى واكيد انا نفسى اسافر والف العالم بس نفسى اسافر ايطاليا كلها والله ... معندكيش اى حد يعزمنى على السفرية دية يا ريري ههههه ... وقبل كل دة اكتر بجد مكان نفسى اروح نفسى وامنية حياتى كلها انى اسافر احج او اعمل عمرة اى حاجة الامهم اسافر هناك وخلاص يارب اكرمنا جميعا يارب

8- أخر هدية قدمتيها لمين؟ وإيه المناسبة؟
كانت خاتم لوحدة صحبتى قريب وكان بس كنا متخانقين شوية ولزيادة المحبة كان الهدية دية وطبعا اكيد عيد الام والحوارات دية بقا

9- موقف أو حاجة عملتيها وندمتي؟
انى عرفت ناس مكنوش محل ثقة نهائى لدرجة انهم سببولى مشاكل كتير بس فى نفس الوقت الحمد لله اتعلمت انى الناس كلها مش زى بعض ... وندمت لما امى زعلت منى قريب ونامت وهى زعلانة منى دية حاجة بتضايقنى جدا

10- قناة فضائية بتحبي تتابعيها؟؟ وأجمل مسلسل شوفتيه لغاية دلوقتي؟ وأروع فيلم؟
mbc , otv , rotana , art , dream يعنى القنوات العادية دية يا ريري
اما بالنسبة للمسلسلات بحب اى مسلسل بيسيب قصة واقعية ويوصل رسالة جميلة وبعشق المسلسلات بتاعة زمان اوى يعنى كان زمان زى مسلسل " هو وهى " و" اللقاء التانى " و " هند والدكتور نعمان " كلها مسلسلات قديمة اوى بس بحبها جدا وبتمنى انى اشفها فى اى قناة واقعد اتابعهم ... وبرضه بحب مسلسل يوميات زوج معاصر لية رسالة فى الاخر " واين قلبى بتاع يسرا كنت بحبه اوى ومسلسلات كتير مفيش حاجة معينة يعنى
اما بالنسبة للافلام ممكن " كدة رضا " او اى فيلم لأحمد حلمى علشان بحبه اوى وطبعا بحب افلام احمد القا وخاصة فيلمى " مافيا وتيمور وشفقيقة " بحب افلامه كلها اصلا وافلام كتير وبرضه اى فيلم فيها قصة هادفة او رسالة لكن اى فيلم مطلعش منه بقصة يبقا فاشل وملوش لازمة انى اشوفه اصلا زى افلام كتير ببتعرض فى السنما دووقتى

الحمد لله خلصت الامتحان ياريت تنورينى تانى يا ريري واى حد اهلا وسهلابيه ويارب تكون اجاباتى تمام
[color=green]اما اكمل الكابتشينو بقا [/color

باذن الله تحققى كل امانيكى يا ساسو
انا خلصت اسئله
وانتى بصراحة اكتر واحده قعدتى على كرسى الاعتراف
مزهقتيش

لو محدش حيسال اختارى حد تانى