حلمى مات .. منقول

حلمي.... مات
معرفش ليه كان قلبي مقبوض اوي من اول مدخلت من باب المحكمه الرئيسي وانا عمال اقدم رجل واخر رجل وكنت حاسس ان كل الناس بتبص عليا من اول العسكري اللي واقف عالباب لفرغلي بتاع البوفيه وعم محروس اللي بيلمع الجزم ومنصور بتاع الدمغه حتى زميلي المحاميين والمبتدئين منهم والمحاميين الكبار ومع اني رميت على كل واحد فيهم السلام لكن مفيش حد فيهم رد عليا السلام كان يوم كئيب من اولو.... رغم ان انا كنت اول مره اجي المحكمه قبل الجلسه بنص ساعه ودخلت القاعه ولقيتها شبه فاضيه ..... حتى المحابيس كانوا لسه مدخلهومش القفص والقت كان بيعديعليا بالعافيه ..... ولقيت نفسي سرحت وقلت يا ترى يا حلمي انت لسه فاكرني ولا نسيتني ..... هو انت عارف ان انا انهارده جي اترافع عنك .... اكيد ما حدش قالك لكن والله يا حلمي انا عمري منسيتك واللي مجنني صمتك وسكوتك .... معلش يا حلمي انا عارف ان الظروف كلها وقفت ضدك لحد محبسوك وفجأه انتبهت لصوت الصول وهو بيزعق ويشتم في المحابيس وهما بيدخلو من باب القفص الوراني ادخلو جتكم البلاوي.... انا عارف اتحدفتوا علينا من انهي مصيبه
ولما شوفت حلمي وسط المحابيس وهو متكلبش من ايديه والحرس من حواليه عنيا دمعت وحسيت اني نسيت كل القوانين اللي انا اتعلمتها وقلت لنفسي
معقول هو ده حلمي انا مش قادر اصدق مالو عجز اوي كده ليه وشعرو كله شاب وضهره اتحنى وزي ميكون عنده ميت سنه وبصيت حوليا ولقيت القاعه اتملت على اخرها اشي محاميين على صحفيين على مصورين ... الصول بص بصه لحلمي كلها غل وقاله
اه يا وش الاجرام غور اقف في الركن اللي هناك ده ومش عايز اسمع حسك.
واتلموا الصحفيين والمصورين ووقفوا قدام حلمي كانه مجرم عتيد الاجرام وفلاشات الكاميرا زي متكون دبابير بتلسع حلمي في وشو وهو عمل يستخبى منهم ويحط وشو مابين ايديه المتكلبشين والصحفيين نزلين اسئله عليه زي المطارق الحدادي هما قبضوا عليك ازاي؟ انت كنت هربان فين كل المده دي؟ هيه المحكمه انتدبتلك محامي يدافع عنك؟ هو انت ليه مش عايز تتكلم؟ اكيد انت عامل مصايب الدنيا كلها ؟
حاولت امنعهم عن حلمي لكن مقدرتش لحد مخرج الحاجب بصوتو الجهور وزعق لاعلى حسه وقال ... محكمه
ودخل المستشارينوقعدو على المنصه والقاعه كلها بقت هس هس وكله قعد في مكانو وحلمي لسه برضو ميعرفش اني جي ادافع عنو وقال القاضي بصوت وقورللحاجب نادي على القضيه الاولى.
المتهم \ حلمي صابر عبد الدايم
واول مالمح حلمي الحاجب وسمعه بينده عليه صرخ باعلى صوتو وفضل يتنطط جوه القفص زي القرد وقعد يشاور بصباعه على الحاجب
ايوا انت الحاجب اللي وقفت قدامي في كل مكان رحت فيه ,ايوه انت السبب في كل المصايب اللي انا فيها دي
ومكنتش فاهم حلمي يقصد ايه ولا اي حد من الحاضرين ومال الحاجب اصلا بموضوع القضيه. وكيل النيابه قال ... يا ريس دا بيدعي الجنون
رديت عليه وقلتلو حلمي مش مجنون واقتحم صوت القاضي اللغو وضرب ضربتين بالدقماق عالمنصه
اسكت يا متهم مش عايز اسمع صوتك خالص.
الاتهام
راح واقف سكرتير المحكمه وقال الاتهام ان في يوم مشئوم بتاريخ غير معلوم قام المتهم باتلاف اهم اللوحات الفنيه للحياه باهماله تارة وبفشله تارة اخرى بقصد التطلع الى امور الحياة
قال القاضي... النيابه
وقف وكيل النيابه واكنو نمر وحلمي قدام عنيه الفريسه وقال نطلب بتوقيع اقصى العقوبه على المتهم.
الدفاع..... حاضر مع المتهم منسي عبد الصبور المحامي .
رحت مقرب من المنصه بعد ملبست الروب الاسود وقلت ارجو من عداله المحكمه ان يتسع صدرها لي لكي اوضح من هو حلمي.
اتفضل يا استاذ.....
حلمي كان بسيط جدا في عيشتو وحياتو ,حلمي لما كان صغير كان حريف واكن نفسو يبقى لاعب كوره مشهور لكن ازاي والوسطه كانت لازم تسبق الحرفنه ,حلمي كان نفسو يغني لانو كان صوتو حلو وجميل وكان ممكن يكون كارم او قنديل بس ملقاش فايده ركز في دروسهوطلع الاول على دفعتو وافتكر نفسو بقى خلاص معيد في الجامعه بس يا حسرة لقى واحد تاني غيرو اتعين مكانو ممكن يكون ابن دكتور او جايز يكون له واسطه جامده .. حلمي بقى حزين وقعد على القهوه سنين ,حتى حبه لبنت الجيران ضاع ومعرفش يحافظ عليه لان ابوهاعايز وعايز وعايز ’قال لنفسو مفيش قدامي غير السفر ,استلف قرشين من هنا ومن هناك وطلع طواليعلى العراق وقامت حرب وضرب هناك مين مع مين مكنش عارف مين ضد مين مكنش شايف ,حلمي يا حضرات اندبح في العراق ورجع في صندوق مخنوق.... هو انتو فكرين ان ده حلمي لا ده مش حلمي.. حلمي وهو راجع كان نفسو يصلي في القدس بس ازاي وهو متحطم ومتحاصر من كل مكان ... المهم رجع حلمي تاني وقال لما اطلع ليبيا شاف هناك الويل وسواد الليل ميت الف واحد زيو هناك ,حلمي ركب المركب مع شباب زيو من كل جنس ومن كل لون ,حلمي غرق في البحر ويا خساره يا ولداه مالوش ديه ,حلمي سافر لبلاد العم سام ,حلمي كان ملوش حدود واندفن هناك في التلج عالحدود ,حلمي كان محترم ,حلمي هو اللي بنى الهرم حلمي يمكن كل الناس مش عرفينوا كان نفسو ياكل من عرق جبينو حلمي عمرو ماهيس وكان نفسو يبقى كويس حلمي كان ابن اصول ولا مره رجع بيتهم مسطول حلمي مكنش نفسو يبقى بيه حلمي كان نفسو ياكل من زرع ايديه حلمي اتقتل هنا قبل ميسافر اي بلد حلمي اتهان جوه وبره حلمي كان بعيد عن اهلو حلمي كان غريب في بلدوحلمي اتسرقت منو كل لوحات الحياه غصب عنو حلمي اتضحك عليه حلمي ضاع منو عمرو قدام عينيه حلمي علق شهادتو عالحيط حلمي شال طوب وتراب ولف على كعوب رجليه.
وصرخ الصول وقال المتهم حلمي اغم عليه
قربت منو لقيت حلمي قاطع النفس رحت صارخ باعلى صوت وقلت
حلمي خلاص مات .. حلمي خلاص مات
رحت معاه المشرحه وشرحوا حلمي قدامي لقو قلبو ابيض ومليان حب لكل الناس وغسلت حلمي وكفنتو بايدياولقيت ناس كتير شباب وعواجيز من كل مكان حضرين جنازة حلمي ودفنت حلمي بايديا وبالليل في الصوان جت نفس الناس فسالتهم
هو انتو جيين تعزوا في حلمي
قالولي ... احنا جيين نعزي في حلمنا
بصتلهم وقلتلهم
انا اللي حلمي مـــــــــــات.......
بقلم الاستاذ\ محمد أحمد الطيب

يا ربي
قصة مؤلمه جدا
هو ده اللي بيحصل كل يوم
ربنا يرحمنا برحمته
تسلم ايدك يا احمد

يارب يا اسماء
شكرا على مرورك

بجد قصة تبكى يسلم ايدك احمد انت دايما مش بتعمل الا الحاجات الحلوة تقبل مرورى

شكرا على مرورك لولو
ربنا يخليكى

حلمي خلاص مات .. حلمي خلاص مات
رحت معاه المشرحه وشرحوا حلمي قدامي لقو قلبو ابيض ومليان حب لكل الناس وغسلت حلمي وكفنتو بايدياولقيت ناس كتير شباب وعواجيز من كل مكان حضرين جنازة حلمي ودفنت حلمي بايديا وبالليل في الصوان جت نفس الناس فسالتهم
هو انتو جيين تعزوا في حلمي
قالولي ... احنا جيين نعزي في حلمنا
بصتلهم وقلتلهم
انا اللي حلمي مـــــــــــات.......

قصة جميلة جدا وواقعية كمان وتحزن بس اكيد في امل
مرسيه كتير

اتمنى ان يكون فيه امل فعلا
شكرا على مرورك الجميل سمسمه
وربنا يصبرنا على حلمنا اللى بيموت