ليه العفريت بيضحك لما بيطلع من المصباح السحرى

اكيد كلنا بنتفرج على الافلام و المسرحيات
و اكيد برضه كلنا سمعنا قصص و حواديت زمان
و اكيد برضه فينا من حلم احلام فيها كوابيس مش تمام

بس احنا لما نيجى نتلكم دلوقت
هنتكلم عن النوعيه اللى بيبقى فيها عفاريت و اوهام
امان يا ربى امان

مش ناقص غير الاوهام و الحاجات اللى
بتيجى فى المنام

طبعا انتو لما كنتوا بتتفرجوا او تسمعوا او تحلموا
كنتم بتشوفوا عفاريت أشكال و ألوان

يعنى مثلا من افلام زمان
افلام اسماعيل ياسين
كان العفريت اهبل و اهطل و على نياته
اللى هو بتاع يا مصطفى

اللى طلع من المصباح السحرى بتاع زمان

و بتاع الافلام الاجنبى
تلاقيه شكله وحش و شرير
اللى تلاقيه بيطلع من خاتم سليمان

و اللى يطلع من كيس بلاستك و اللى يطلع من الكوز
و اللى يطلع من ازازة برفام
و الغريبه ان كل الحاجات دى سحريه كمان

يا حلاوه زمان [ندعوك للتسجيل في المنتدى أو التعريف بنفسك لمعاينة هذه الصورة]

و لسه فى كمان
من اللى بيظهروا فى اى مكان
و فى كل الاحوال تلاقى العفريت و بتبقى اخلاق العفريت
من دول مرتبطه ببيئته و تربيته

( دا لو كان متربى من أصله ) و طبيعة المكان

بس سألتوا نفسكم قبل كدا هذا السؤال

ليه العفريت لما يطلع من المصباح السحرى بيضحك
و بيضحك على ايه؟[ندعوك للتسجيل في المنتدى أو التعريف بنفسك لمعاينة هذه الصورة]

اى عفريت اول ما يطلع من البتاع اللى كان فيها
يضحك ها ها ها ها
هع هع هع هع
طبعا بصوت عالى و فيه صدى صوت ضخم عشان
الزبون يترعب و يخاف و يكش من دا الوش

و فى نفس ذات الوقت نفسه تلاقى الجمله التانيه
المشهوره
شوبيك لوبيك امشى على ايديك
وفوق مرفوعه رجليك

و فى روايه اخرى شوبيك لوبيك
سمسارك ادام عينيك

و روايه اخرى شوبيك لوبيك
مش هتقدر تغمض عينيك
.........الخ

سيبكم من الفيلم الهندى الحمضان دا كله و خليكوا دلوقت فى السؤال
هو بيضحك ليه ؟

بص يا فندم بصى يا فندمه ( مؤنث فندم بالفكاكه طبعا )

تعالوا شوفوا معايا يا محترم منك ليها ليها له
بعد تدقيق و تفحيص
تم الوصول الى هذه النتيجه

طبعا سيبك انت من السيكولوجى و الكلام دا

الحاله النفسيه اللى انت بتكون فيها لما بيبقى العفريت ادامك

يعنى منظرك التحفه لما بتكون واقف ادامه و خلاص
شويه و البنطلون هيتبل

و طبعا العفريت اول ما بيشوفك كدا بيفطس
على نفسه من الضحك
دا ممكن يكون سبب

و خوفك دا بيوصل للعفريت فى حين انه كمان
ادرى بظروف سيادتك المنيله بنيله
و المهببه بهباب اسود ( طبعا لازم يعرف اومال
اسمعه عفريت ليه )
تفتكر دا برضه ممكن يكون سبب

و يمكن برضه يكون ما صدق ان حبسته انفكت
خلاص و اخد افراج ( طبعا مفيش حد بياخد افراج
عندنا دلوقت كله يقوله يجدد حبسه لمده 45 يوم
على زمه التحقيق و بعدها ممكن يفكروا مجرد فكره
انهم يفرجوا عنه بكفوله قصدى كفاله )

و طبعا ضحكته الهستيريه دى نوع من انواع الفرح
الجنونى و العته المغولى
فرحان بقى اللى هو خرج و حس بالحريه

و بلاش تجى فى ذهنك الاسئله دى
مين اللى حبسه
و اتحبس ليه و كدا

يا فندم بقولك بلاش تعرف

يا عم خلاص انت الكبير
مصمم يعنى

زى بعضه
و لو انى مش موافقك على كدا
بس حرد عليك و اقولك
ان محدش يعرف هو اتحبس ليه من أصله !!!!

انما المهم ان سيادتك بدعكة ايدك الكريمه لاى
بتاع سحرى

سواء كان مصباح او لمبه 120 او كوبس كهربا
او حتى خاتم ولا سلسله
ولا حتى ازازه بس طبعا لازم تكون سحريه
انشالله حتى قرطاس سحرى

كنت انت صاحب امر الافراج عنه
و شعوره بالحريه
بدل الزنقه السودا اللى كان مزنوقها ولا كأنوا فى اوتوبيس من الاوتوبيسات بتاعنا

طبعا اوتوبيساتنا هى اللى تكسب
كفايه ان الواحد مش بيعرف يدخل ايده فى جيبه
من الزنقه
و الغريب انك تلاقى الكومسرى بيلم الاجره
اموت و اعرف بيعرف يعدى من وسط البشر كل
دول ازاى

فيها ايه لو كل واحد فضل قاعد على كرسى كدا و شكله محترم
ولا هى لازم الزنقه
تحس انك راكب علبة سردين مفتوحه

المهم بقى خلونا فى موضوعنا

كل العفاريت اللى فاتت دى مدلعه و بتتأمر [ندعوك للتسجيل في المنتدى أو التعريف بنفسك لمعاينة هذه الصورة]

طب سيادتك فكرت كدا لو جربنا ندعك
لومان طره السحرى
او لومان ابو زعبل السحرى ايه اللى هيحصل

طبعا العفاريت فيه بالعبيط على قفا من يشيل
و عفاريت ايه من اللى قلب يقع منهم

اللى واخد بشله فى قرنه
و اللى واخد ماسوره فى ديله
و اللى واخد ساطور فى بطنه و طالع من ظهره
يعنى حبه من اللى انت تشوفهم و تدعيلى

نرجع لموضوع الضحك
ممكن برضه بيكون بيضحك على الاخ الساذج ده
اللى هو متخيل نفسه ان هيعرف يحقق أحلامه
و طموحاته فى البلد الللى عايش فيها

لمجرد انه طلعله عفريت دا انت حتى لو طلعلك قبيله عفاريت انسى يا عمرو

طب بلاش كل دا يا عم و خليك معايا هنا
بما ان المذكور عفريت يبقى عارف انت ممكن
تطلب ايه و بتحلم بايه و بتتمنى ايه

دا مش سبب كافى انه يضحك و يسخسخ من
الضحك
مش بعيد يروح فيها كمان و ميلحقش يقولك شوبيك ولا لوبيك

طب قولى كدا لو طلبت هتطلب ايه ولا ايه و لا ايه
هتطلب ميه نظيفه
ماتدفعش الزباله على الكهربا و على الميه
و على الغاز كمان

هتطلب انهم ميكسروش فى الشوارع و يسبوها على حالها المايل

هتطلب انه يقلل من الاسعار

هتطلب هوا نظيف

هتطلب ان يشغل ابنك اللى متخرج بقاله سبع سنين
دا فى ناس بقالها 15 سنه مستنيه جواب التعيين من القوه العامله
يعنى خليه يستنى كمان 8 سنين

هتطلب منه انه يخلى بنتك تخرج براحتها و تمشى فى الشارع و هى مش خايفه

يا جدع زمانك انت اللى بتضحك دلوقت او انتى اللى بتضحكى

كل دا و مش عايزه العفريت نفسه يضحك

و عندك بقى قصص متوارثه كتيييييييير
عن العفاريت و أفعالهم
الكثير و الكثير عدد لا يحصد له

و كلها ليها معنى دا طبعا للى بيفهم
و ليها دلاله للى بيدرك الواقع
و طبعا لا ليها لا معنى ولا دلاله للى مش عايز يفهم
او لو كنت ( من غير مؤاخذه يعنى ) مش عايز تدرك

عند سعادتك فى قصه مأثوره و شهيره جدا مش عارف اذا كنتم سمعتم عنها ولا لا

القصه المشهوره بتاعة الراجل العراقى اللى كان ماشى فى العراق ( سبحان الله )
فى التمانينات و كانت أيامها العماله المصريه مغرقه العراق فى الوقت دا طبعا

و الراجل دا ماشى يسب و يلعن و مش لاقى شغل و حالته بالبلى و فجأه طلعله العفريت

مش هتفرق منين هو طلع منين يمكن بلاعه سحريه او من الدولاب السحرى
او اى حاجه سحريه برضه

و بعد الشويه اياهم اللى احنا قولناهم
ايه مش فاكرين
انتو لحقتوا تنسوا ولا الضحك خلاكوا تهيسوا و تنسوا

لحقتوا تنسوا الفيلم الهندى اياه
هع هع هع هع
و شوبيك و بفتيك و الكلام دا

المهم الراجل دا كان قنوع قوى
كان عنده طلب واحد بس هو طلبه الاول و الاخير
هو انه يطرد كل المصريين اللى موجودين فى العراق و يوزعهم على مصر
او فى اى مكان تانى

فكان رد العفريت
دا انت راجل تيت ....و. تيت ...و. تيت
..و... تيت ......و..........
( معلش الرقابه عدت على الموضوع و قطعت
منه الاجزاء دى )

و كمل العفريت كلامه و قال للراجل
اذا كنت انا اصلا مصرى
( الظاهر ان العفريت دا مكنش لاقى شغل فى مصر
فرحلوه على العراق على ايد الوزاره العفريتيه )

و احنا طبعا عارفين العفاريت قليله الحيله ( ليها كل العذر طبعا )

من مصر للعراق حتى بولاق يا قلبى لا تحزن
حتلاقى من دا كتييييييييير

يعنى لما يكون طلبك من العفاريت شقه ايجار قديم
ولا حتى ايجار جديد بس مستديم او عقد عمل فى الامارت او السعوديه

و الدول الاخرى طبعا مش امريكا او فرنسا او ايطاليا او حتى المانيا

او حتى طلبت منه عاروسه ملهاش فى الشات اللى كلنا بنسمع عنه

اعوذ بالله من اللى بيحصل فيه من ألفاظ و عبارات تخدش حياء اى فتاه او اى حد محترم

طبعا مش هيكون عن العفريت غير رد واحد بس و هيقولك

جيتلك يا عبد المعين تعنى لاقيتك يا عبد المعين
عايز حد يعينك

هيقولك
كنت نفعتى نفسى و سكنت فى سحابه ملوكى بدل الزنقه اللى انا كنت مزنوقها دى

او حتى مكنتش اشتغلت الشغلانه الهباب دى اللى
جايبالى الكافيه

و لا حتى كنت اتعاملت مع الناس البيئه اللى زيك
دا طبعا لان العفاريت بيطلعوا للفقرا بس

يعنى هيطلع لواحد من اياهم
دا لو طلع لواحد منهم و لسه هيقول هع هع هع
و قبل ما يقول شوبيك
خدوه على ابو زعبل دا من الاخوان دا معارض

ولو سابه يقوله شوبيك و بفتيك
هيقولك هسألك سؤال
هل انت من المؤيدين لحكوماتى ام لا قدر الله من المعارضين

كل دا ومش عايزه يضحك

و صادف مره واحد كان ماشى على الكورنيش اسمه فتحى

و ماشى فى امان الله كدا و عمال يفكر
المهم طلعله عفريت
محدش يسألنى منين

انتوا عارفين
صح من الاوتوبيس النهرى السحرى
شطار
المهم العفريت بقى
ها ها اها ها
شبيك و لبيك و بفتيك فى ايدك

فتحى دا بصله كدا من فوق لتحت
انت عفريت هتعرف تعمل حاجه ولا هتروش عليا

قاله قولى طلباتك ايه ؟ طلباتك مجابه

المهم حظ العفريت الاسود ان الاخ من مشجعى
الكوره القصريه قصدى المصريه

و قاله انا عايز الزمالك تكسب الاهلى الماتش الجاى
العفريت اتكتم و معرفش يتكلم

شويه و هرش فى قرونه كام هرشه كدا و بعدها تنح و قاله

يا عم شوفلك طلب تانى متحرجنيش معاك

قالوا بقى كدا اوك يا عفريت
انا عارف انت مش ناوى تجيبها لبر

المهم قاله انا عايز بقى
الانتخابات تكون شريفه و نزيهه
و عايز حكايه الكوسه و الوسطه دى تتمسح
و عايز العدل فى الحكم
و عايز...... و عايز........ و عايز.....

المهم العفريت بعد ما نام شويه [ندعوك للتسجيل في المنتدى أو التعريف بنفسك لمعاينة هذه الصورة]صحى لاقاه لسه بيقول
عايز .... و عايز......

قاله يا عم قصر انت عايز الزمالك يكسب الاهلى سته كام
و عايزه يكسب قبل ما الدورى يخلص بأسبوع ولا اكتر

ها عرفت دلوقت العفريت بيضحك ليه و على ايه ؟ [ندعوك للتسجيل في المنتدى أو التعريف بنفسك لمعاينة هذه الصورة]

لو طلعلك عفريت انت بقى هتعمل معاه ايه ؟ [ندعوك للتسجيل في المنتدى أو التعريف بنفسك لمعاينة هذه الصورة]
و لو لقيته بيضحك ( لازم بيكون يضحك يا ما يكون عفريت من اياهم ) هتعمل معاه ايه

م . ل . ط . و . ش

لو طلعلي عفريت من اياهم
هجري
ههههههههههه
انا بخاف من العفاريت

موضوع جميل جدا يا احمد
تسلم

هههههههههههههههههه
ايه يا عم الجو المكهرب ده
هفريت وحاجات
مرسي كتير علي شويه الرعب دول
تسلم يا باشا

شكرا ليك كتير احمد
موضوع جامد والله
كله عفاريت وحاجات مرعبه كده

ههههههههههههههه

حلوة الحواديت دي

والاحلى البفتيك صراحة

لو طلعلي هديله حاجة ساقعة زي مانت والله لاانت راجع زي مانت

خليك مستريييييييييح

مرسيه للموضوع الجامد ده

شكرا على مروركم يا شباب

عادى جدا لو طلعلى عفريت
دى فرصة العمر يا جدعان
هههههههههههههههههههه
بس عفريت تنفيذ طلبات مش عفريت يلا بينا يا خفيف على الشيوخ
هههههههههههههههههههه
الهينور ا احمد
تسلم ايدك يا علم

شكرا على مرورك يا محمد

لا انا قلبى جامد خالص
هههههههههههه دة انا اروح فيها

ههههههههه
شكرا على مرورك لينة

شكرا علىمرورك محمد

ولا هيحصلى حاجه
احنا رجاله بتوع ايام زمان
مش بتوع اليومين دول
ههههههههههه
اختكم فى الله لو طلع ليها عفريت راح تتوكل على الله
مش هيبقى فى يوسى فى المنتدى
وتقعدوا تعيطوا
تقولوا فينك يايوسى
فأحسن تشيل الموضوع اصلا
ههههههههههههههههههه
ميرسى ليك ياغاااااااااااااااالى
تسلم يااحمد