تحيــــــــــــــا مصـــــــــــــــر

السمكه و الربع جنيه و تحيا مصر
مره واحد صياد اصطاد سمكه و اخدها معاه البيت فبيقول لمراته تقليها
قالتله مفيش زيت ده الازازه بقت بـ10جنيه فقالها طب اعمليها بصلصه قالتله مفيش طماطم ده الكيلو بـ5 جنيه
قالها طب اشويها قالتله الانبوبه فاضيه ده حتى تغييرها بقى بـ8 جنيه الراجل
اتخنق فأخد السمكه و رماها البحر فطلعت من الميا تهتف و تقول تحياااا مصر ...
فعلا تحيا مصر

هى ممكن تضحك فعلا لو هتبصلها على انها نكته

و ممكن تبكيك لو منها شوفت اللى بيحصل فى البلد

طب هحكيلكم حكايه تانيه واحد عامل بسيط بيشتغل فى كلية الصيدله فى جامعه المنصوره
الراجل ده مرتبه اقل من 200 جنيه
متزوج و يعول ... تخيلوا
المهم الراجل ده بيدى كل شهر الفلوس فى ايدى مراته و يقولها تتصرف فيه
و هى كل يوم بتديله ربع جنيه .. بيمد ايه لمراته كل يوم زى اى طفل و ياخد ربع جنيه مصروفه
و مع ذلك عمره ما قال حاجه و كل يوم يقول الحمد لله انه موجود و عمره ما قال ان ده حرام
كان بيعمل ايه بقى بالربع جنيه الى معاه ؟؟؟
كان بيخلى معاه الربع جنيه و تانى يوم ياخد الربع التانى و يجمع 50 قرش و يشترى ساندوتش فول من البغل اللى عند الجامعه
بس دلوقتى الساندوتش بقى بـ60 قرش
يا ترى الراجل ده هيستنى كام يوم علشان يشترى ساندوتش ؟!
بزمتكم مش حرام ؟؟؟

الاتنين دول ناس عندنا هنا فى مصر

ناس جمبنا بنشوفهم كل يوم و ممكن يبقوا جيرانا
الناس دول حوالينا فى كل مكان
يبقى حرام ولا لا ؟؟ كل حاجه بتغلى و المرتبات زى ما هى
طب علوا الاسعار براحتكم
بس ادوا للناس مرتبات
ليه لغايه النهارده اللى بيشتغل مش بياخد مرتب
تخيلوا ان مفيش لا مدرس و لا موظف ولا واحد شغال فى اى شغل حكومى بياخد مرتب
طبعا استغربتوا و بتقولوا امال ايه اللى بياخدوه اخر الشهر ده صح ؟؟؟
المرتب يعنى مبلغ من المال بياخده الشخص فى نهايه الشهر و المفروض انه يكفى لتلبيه احتياجاته
كالمأكل و المشرب و الملبس و المسكن و العلاج و الترفيه ايضا .. طبعا مش ده اللى بناخدوا فى مصر
اللى بناخده ده اسمه مرتب إعانه بطاله .. فى البلاد الكبيره زى امريكا مثلا لما مش بيقدروا يوفروا شغل
لحد بيدوله حاجه اسمها مرتب اعانه بطاله و ده اللى بياخده اللى بيشتغلوا فى مصر
مبلغ شهرى لا يكفى لسد حاجاتهم الاساسيه كالمأكل او المسكن او الملبس
ولا حتى يكفى الواحد انه ياكل بيه عيش حاف مش فول و طعميه ...
طب نعمل ايه طيب ؟؟ مطلوب مننا ايه ؟؟؟
بيقولوا للمدرسين متدوش دروس خصوصيه
طب هيجيبوا فلوس يصرفوا بيها على ولادهم ازاى ؟؟؟ ولا يشحتوا ؟؟
ده حتى الشحاتين بيقبضوا عليهم و يدخلوهم السجن
و فى كتيييير و كتييييييير زى دول و اكتر
فى اللى مش لاقى فعلا يجيب عيش حاف ليه
واحد جاله التعين تعاقد يعنى و كده بمرتب
راح فعلا يستلم و هو فرحان
تخيلوا لقاه بكام ؟؟ 90 جنيه مصرى لا غير شهريا
موصلاته فى اليوم الواحد 5 جنيه
متوسط 25 يوم فى الشهر بعد ما شلنا الاجازات
يعنى هيصرف موصلات 125جنيه
يعنى علشان يقبل الشغل و يشتغل هناك يا اما يشتغل حاجه تانيه و ده طبعا ممنوع فى الحكومه انك تشتغل شغلتين
و لو عملت كده بتتعملك قضيه
يا اما ياخد مصروف من ابوه
طبعا مكانش قدامه حل تانى غير انه يستقيل و ميقبلش الشغل
و على الرغم من انه خريج تجاره .. بس شغال تباع مع سواق على عربيه نقل
مش لاقى حاجه تانيه يشتغلها علشان يجيب فلوس و المضطر يركب الصعب زى ما بيقولوا
كمان حكايه .. كلنا عارفين التوكتوك ؟؟ فى حد ميعرفوش ؟؟؟
اللى بيقوله ان ده البيبيه بتاع العربيات النقل
هو ده
واحد خريج سياسه و اقتصاد بتقدير جيد جدا تقريبا
شغال على توكتوك
طبعا كان امله انه يبقى معيد او يشتغل فى السلك الدبلوماسى و يسافر و يلف الدنيا
و احلاام و احلاام و احلام كلها ماتت لما وقعت على ارض الواقع
وقع على جدور رقبته و كل احلامه اتكسرت و ماتت
مفيش معاك وسطه مينفعش تشتغل فى حاجه من دى
طب الناس تعمل ايه ؟؟
تطفش و تهج و تسيب البلد ؟؟؟
و الله لو عارفين كانوا عملوا كده
بس محدش عارف يسافر بره
لا هما اللى لاقيين فلوس السفر ولا العقود ولا حتى فلوس تذكرة السفر
و لو راحوا تهريب يا بيموتوا يا بيرجعوا تانى
محدش عارف يعمل ايه
فى بلدنا و حاسين اننا اغراب
لا احنا اللى بنتعامل كويس ولا احنا اللى قادرين نعيش فيها حتى
و على النقيض تماااااما هنلاقى ناس كتيييير جدا مش عارفين يودوا الفلوس فين
سبحان الله يا اخى الحكومه بتظبطهم تظيط كأنهم اخواتهم الصغيرين
يعنى واحد من الناس اشترى حته ارض سعر المتر 5جنيه و بعدين الحكومه اشترتها منه تانى المتر ب50 جنيه
طب ما من الاول كنتوا ادولوا الفرق و سيبوا الارض عندكم
يا جماعه حد يرد على انا لو اتجننت هيبقى من ايه ؟؟
من اللى فوق ولا من الاخ اللى فى الاخر ؟؟؟ ولا من طيبة الحكومه ولا من قساوتها
مش هقول لحد يعمل حاجه
لا هقول اعملوا مظاهرات ولا تعملوا حاجه ولا حتى تقولوا ليه
الى انتوا عايزين تعملوه اعملوه انا حتى مش عارف انا عملت الموضوع ده ليه
بس اللى نفسى يحصل بجد
ان الحكومه زى ما بتاخد بالها من الغنى
تبص شويه على الفقير
زى ما هى بتغلى تمن كل حاجه تشوف الاول ازاى الناس هتشتريها
ربا معانا يا رب
و ربنا يصبرنا عل ما بلانا و على رأى السمكه
تحيااااا مصر

فعلا تحيا مصر
فعلا الحال بقى غريب وصعب جدا على اغلب الشعب المصري
أعانهم الله ورزقهم من حيث لا يحتسبو
وربنا على الظالم والمفتري
والف شكرا ليك

امين يارب
شكرا على مرورك الجميل اسماء

انا بقى هحكيلكوا حكاية حصلتلي من كام يوم

رايحة الكلية وقفت تاكسي عشان اركب

قالي ماشي ركبت

هو راجل كبير اوي في السن

بيقولي انا كنت رايح للراجل اللي انا شغال عنده

عشان هديه العربية ومش هشتغل عنده تاني

بعد ماشتغلت عنده 6 سنين حسبي الله ونعم الوكيل

مراتي تعبانة وعايزة جلسات الجلسة ب 300 جنيه

وانا معيش رحت اطلب من الراجل 250 جنيه

قالي لا واتريق عليا يقولي 200 مرة واحدة طب 10 20 50 جنيه لكن 200 مرة واحدة

وبيعيط ويقول جارتي المسيحية سلفتني 100 جنيه اعمل ايه بس

حسبي الله ونعم الوكيل وصلت الكلية مكتئبة

ادي مثال حصل وبيحصل...اللي يخلي راجل زي ده يشتغل لغاية النهاردة ده ظلم

مرسيه ليك

لا حول ولا قوه الا بالله
ماهو المثال ده حتلاقيه فى كل حته
ربنا عالظالم

شكرا على مرورك

لا حولة ولا قوه الا بالله العلي العظيم
قال رسول الله صلى الله عليه وآله وسلم :
((يأتي زمان علي أمتي يحبون خمس وينسون خمس ... يحبون الدنيا وينسون الآخرة يحبون المال وينسون الحساب يحبون المخلوق وينسون الخالق يحبون القصور وينسون القبور يحبون المعصية
وينسون التوبة فإن كان الأمر كذلك ابتلاهم الله بالغلاء والوباء والموت الفجأة وجور الحكام)).
حسبي الله ونعم الوكيل
ربنا علي الظالم والمفتري
شكرا ليك يا احمد

صح يا زيزي
شكرا على مرورك الجميل

الله ينور يا احمدالموضوع الهايل ده
تسلملى يا جميل وياريت تحطلنا دايما مواضيع زى دى

شكرا علىمرورك محمد

ميرسى ليك يااحمد
ربنا يخليك للبشريه ولينا وللمنتدى
تسلم

شكرا على مرورك يسرا